Feruza Muhamedova

Ishtirokchi haqida

Feruza Muhamedova — 33 yoshda, san'atshunoslik bo'yicha PhD, O'zbekiston Davlat konservatoriyasi bilan bog'liq. U opera qo'shiqchilari oilasida tug'ilgan va go'daklikdan konsert hamda madaniy tadbirlarga qatnab yurgan, biroq bolaligida musiqachi emas, tarjimon, jurnalist yoki filolog bo'lishni orzu qilgan. Musiqaga qiziqishi faqat o'smirlik davrida uyg'ongan. Shundan buyon Feruza o'z qobiliyatini rivojlantirishda to'xtamagan: Italiya, Gretsiya, Rossiya, Ozarbayjonda o'tkazilgan xalqaro musiqa tanlovlarida qatnashgan, katta zallarda konsertlar bergan. U O'zbekiston fortepiano san'ati tarixi va XX–XXI asr pianochilari ijodini o'rganadi, buni kelajakda vatanimiz musiqa san'atini targ'ib qilish uchun ishlatmoqchi. Tadqiqotchilik faoliyati bilan bir qatorda, u o'zbek bastakorlari asarlarini tahlil qilib, ularni sahnada ijro etadi va o'z bilim-ko'nikmalarini pedagogik faoliyatda faol qo'llaydi. Uning tadqiqotlari yoshlarning madaniy-ma'naviy saviyasini oshirishga hamda O'zbekiston fortepiano san'ati ustalari ijodini tinglovchilarga tanishtirishga xizmat qiladi.