Xushvaktova Mo‘tabar (O`rikguli)

Ishtirokchi haqida

Xushvaktova Mo‘tabar (Urikguli) - jurnalist, ekologik va ijtimoiy adolat mavzularini o‘zbek tilida ommalashtirayotgan faol bloger hamda ko‘ngillidir. O‘zbek tilida ekologiya, inklyuziya va ijtimoiy adolat haqida yozib, yuzlab oilalarga ta’sir ko‘rsatgan eko-blog asoschisidir. Mo‘tabar so‘nggi besh yil davomida Instagram, TikTok, YouTube va boshqa platformalarda ekologiya, bolalar tarbiyasi, inklyuziv shahar, onalik va ayollar huquqlari haqida sodda va tushunarli tilda yozib keladi. Farzandi tug‘ilgach, o‘zbekcha sifatli kontent deyarli yo‘qligini ko‘rib, bu bo‘shliqni to‘ldirishga qaror qilgan. Uning uchun ekologiya - bu faqat daraxt ekish emas, balki resurslarning adolatli taqsimlanishi, inklyuziya va kelajak avlodning sog‘lig‘i bilan chambarchas bog‘liq masaladir. Mo‘tabar ekologik muammolar va ijtimoiy adolat bir-biri bilan uzviy bog‘liqligini, iqlim o‘zgarishi oqibatlaridan kam ta’minlangan qatlamlar ko‘proq jabr ko‘rishini ta’kidlaydi. U o‘quvchilarini atrof-muhitga befarq bo‘lmaslikka va o‘zgarishlarni bugun o‘z uy eshigi oldidan boshlashga chaqiradi. Asosiy yutuqlari: • O‘zbek tilida ekologiya va ijtimoiy adolat mavzularini tizimli yorituvchi yetakchi eko-blog va ijtimoiy media hamjamiyatini barpo etdi. • Nogiron farzandli oilalar, yosh onalar va keng jamoatchilik uchun inklyuziv shahar, xotin-qizlar huquqlari hamda ekologik madaniyatga oid mavzularni sodda tilda ommalashtirdi. • Anhor bo‘yini tozalash kabi ekologik tashabbuslarni boshlab, ko‘plab odamlarni, o‘z do‘stlari va qo‘shnilarini tabiatni asrashga jalb qila oldi. • Ekologiyani ta’lim, sog‘liq va inklyuziya bilan bog‘lab, "har kim bir xil toza havodan nafas olish huquqiga ega" degan g‘oyani keng targ‘ib qildi. • O‘z faoliyati va yozgan bloglari orqali yuzlab insonlarning dunyoqarashini o‘zgartirib, ularni ekologik tashabbuslar boshlashga ruhlantirdi.